ஷீர்டி சாயி சத்சரிதம்
சிலசமயங்களில், அருமையான ரத்தினங்கள் பதிக்கப்பட்ட, மயிற்பீலி செருகிய தலைப்பாகை, - சிலசமயங்களில் பொன்மகுடம் - சிலசமயங்களில், பளிச்சிடும் நிறத்தில் தலைப்பாகை - அவருடைய தலையின்மேல் அணிவிக்கப்படும். ஜரிகை வேலைப்பாடு செய்யப்பட்ட அழகிய சால்வை அணிவிக்கப்படும்.
வைரங்கள், முத்துக்கள், மரகதம் ஆகியன இழைத்த மணிமாலை பிரேமையுடன் பாபாவின் கழுத்தில் அணிவிக்கப்படும். சிலர் அவருடைய நெற்றியில் நறுமணம் கமழும் கஸ்தூரி திலகம் இடுவர்.
சிலர் அவருடைய பாதங்களைக் கழுவி, அர்க்கியம், பாத்தியம் ஆகிய பூஜைகளை செய்வர். சிலர் குங்குமப்பூக் குழம்பை உடலில் சுகமாகப் பூசியபின் தாம்பூலத்தை பாபாவின் வாயில் இடுவர்.
ஐந்து திரிகள் ஏற்றப்பட்ட ஆரதியையும் கற்பூர நீராஞ்சனத்தையும் பாபாவின் எதிரில் சுழற்றிக் காட்டுவர். இக் காட்சியின் சோபை ஒப்புவமையற்றது.
பாண்டுரங்க மூர்த்தியின் வதனத்தில் தோன்றும் திவ்விய ஒளியின் பேரழகை, சாயியின் முகமண்டலத்திலும் கண்ட துரந்தர் சகோதரர்கள் வியப்பிலாழ்ந்தனர்.
வானமண்டலத்தில் அடிக்கும் மின்னலைப் பூமியில் வாழும் மனிதர்களால் நேரிடையாகப் பார்க்க இயலாது. அதுபோலவே, சாயியின் முகத்திலிருந்து வீசிய தேஜஸ் (ஒளி) அவர்களுடைய கண்களைக் கூசவைத்தது.
விடியற்காலையில் காகட ஆரத்தி நடந்தது. துரந்தர் சகோதரர்கள் அதற்கும் சென்று தரிசனம் செய்தனர். அப்பொழுதும் பாபாவின் முகத்திலிருந்து வீசிய அதே ஒளியைக் கண்டனர்.
அந் நாளிலிருந்து அவரது இறுதிநாள்வரை, பாலாராமுக்கு சாயிபாதங்களின் மீதிருந்து அத்தியந்த பக்தியும் விசுவாசமும், ஆடாது அசையாது சிறிதளவும் குறையாது இருந்தது.
ஹேமாட் சாயிபாதங்களில் சரணடைகிறேன். அடுத்த அத்தியாயத்துடன் இக் காவியம் பூரணமாகும். அதன் பிறகு சிம்ம அவலோகனம் நடைபெறும். கடைசி முறையாக எனக்குக் காது கொடுங்கள்.
எல்லாருக்கும் க்ஷேமம் உண்டாகட்டும்! ஞானிகளாலும் சான்றோர்களாலும் உணர்வூட்டப்பட்டு சாயிபக்தன் ஹேமாட் பந்தால் இயற்றப்பட்ட. "ஸ்ரீ சமர்த்த சாயி சத் சரித்திரம் என்னும் காவியத்தில், 'மூன்று பக்தர்களின் விருத்தாந்தம்' என்னும் ஐம்பத்தொன்றாவது அத்தியாயம் முற்றும்.
ஸ்ரீ சத்குரு சாயிநாதருக்கு அர்ப்பணம் ஆகட்டும்.
சுபம் உண்டாகட்டும்.
